Act 27 | ASO | STEP | Paulo' aza Italia misubouko vilive li li huki alinge' nene ami vanu hadeti neti gizebo ve ma gulive Zulio' aza gizebo o-ngedo ngele'mizo vilive li Paulo'nisi ido' nalato' ve linge masi anau' milani'. A'mine gizebo ve nene aza ami mulise ma guvelesi ve Kaesale'ni ve lani' muliseuti' minine'.

Acts 27

Paulo' Aza Sipiu' Dizo Loma Ebeta Volosa Vine' Gamazi

1 Paulo' aza Italia misubouko vilive li li huki alinge' nene ami vanu hadeti neti gizebo ve ma gulive Zulio' aza gizebo o-ngedo ngele'mizo vilive li Paulo'nisi ido' nalato' ve linge masi anau' milani'. A'mine gizebo ve nene aza ami mulise ma guvelesi ve Kaesale'ni ve lani' muliseuti' minine'. 2 Anau' milikevo ngele'mizo vo sipiu' nazasi maka' dizune. A'mine sipi nene Adalamitio ebetati' ogavo a'mine sipi nene Asia misubou' guvo noso gahevela numuno ebe' vai' minido' vilive likevo dizo vune'. Ido' Makedonia misubou' Tesalonika ebekuti' ve ma gulive Alisitako' nene lezesi maka' vune'. 3 Sipiu' ongo mino go' lavo vo Sidoni ebeta hetelune. Hetelo Zulio' aza Paulo'ni nasahili' o-do zogo ve've zuho vo ningavo nasahili' i-dilizave lo gele emavo vine'. 4 Vo zogo ve ningo tine' molo ogavo gohi sipiu' dizo a'mine ebe' hulo novunivo vune' akalati' hepe' naba elavo Kipilo ailani adavala neivo hepe' naba elamine' liginela ivile' ogo vovo' vovo' ogo 5 guvo noso huko'mo vo Kilikia misubo ido' Pamahilia misubo gahevela ledo vo Mila ebeta Likia Misubou' vo hetelune. 6 Hetelo a'mine sipiuti' lemo nelo' Alekisadilia ebetati' sipi ma ogo minine' nene Italia misubouko volosa neivo amiliti gizebo ve ne'mo lele'mizo vo a'mingu' dizo 7 ongovo otevo' ogo silibe o'mo vo zou zou lo vovo' vovo' ogo Kinido' ebe' gahevela ogo hetelo hepe' naba ilidi'mo volosa unida nene vo pelo vamolone' ogavo adava gahevela lemo vo Keleta ailani ne'mi mumunouko hepe' elamida vo Salomone ebe' ivile' ogo vune. 8 Noso gahevela do noalito silibe o'mo vo vo Lasea ebe' gahevela ebe' ma gulive Sipi Igi Minaa' Ebe' Lamine' ve lani' nelo' vo gahevela minune.

Hepe' Naba Iline' Gamazi

9 Gamene ha'na ogo vavo Zuda velite noso' nite' malise iga' ani' gamene nesi ivile' okunivo ne'mo hepe' naba elo guvo noso velo mono sipi do goloso o-ngedaa' ine' gamene noalitivo imine' molo volonekisi goloso ogalone' neivo Paulo' ga'ine do ti' lo lo-ngimine': 10 E'e, vekizo, volobe lo giluvoni'za vamolonido' o neive. Nene guvo nosoli'mo sipiu' dizo dovo' hilingizevo' ogavo go' heneni nganenivo' goloso ilivoba laza evenekisi nosou' lemo helelobe lo giluvo geni ogave. 11 Ne'mine line'za sipilo' dalizave lo gono gamazi lo-ngedaa' ivesi ido' sipi melehosi gamazi ato' likesivo amiliti gizebo ve giline' Paulo' gamazi lemavo setalitisi gamazi dizavo a'mido' gele dani'. 12 Ne'mine ogavo laza minune' ebe' nene hepe' naba eleline' gameneu' sipi nene lamine' minaa' ebe' minamine' nenako nemu' nene sipiu' minani' evene' vai' gidini nete ingine a'mine ebe' nene hulo volone li gamazi li hukani'. Ido' Keleta ailani gahevela sipi minaa' ebe' gohi ma neine' gulive Hoinika nene hepe' naba eleline' gameneu' haleke minaa' ebe' lamine' neine' nenako nemu' a'mida ha vo hetelelobe ha vo' nalone li gilani'. 13 Ti' li gilisa gilani' nene adavalati' hepe' ngomo zou zou lo api' ogo elavo lunida ha volosune li gili sipi di gili' limikani' inite' nene di hozi li di milikevo Keleta ailani gahevela novunivo 14 vo hoto' amunivo ailaniuti' mumu gehegehe naba gulive ho' dizaa' ida ezalati' lomaa' ive mumu gehegehe amuzovesi soto' ogo 15 sipi do velepe' izeline' ogo ngelo aka do hehe lamolone' ogavo alamo hulokunivo hepeli'mo do vivo gopo aka vine'. 16 Ailani ngomo gulive Kauda helala neivo hepe' elamine' liginela novunivo kanu ngomo ma gelelehe' une' nene nosou' lemeline' ogavo ge'nebe gono do 17 gelelehe' ogo sipi nabau' do molo ido' sipi nene etalive lo nala' vodo vodo ogo izo do gili' lune. Ne'mine ogo gepeli'movo' o minine' ebe' ma gulive Siliti nela vo goloso ogalone lo sipili'mi initekisi seli lingesi hepeli'mo do ngu'vosalive lo apaso do molokunivo sipi nene haza minivo gopo aka vune'. 18 Ne'mine ogavo hepe' amuzo'vesili'mo sipi do voziu' vomiu' o-do minine'. Ne'mine neivo go' lavo heneni linge nene guvo nosou' di huli huli' ani'. 19 Ne'mine igi gohi go' lavo gamene seto hamo ogavo angise'ine a'inedunu' igi sipi'mi inite' mata've lingelati' a'mine'mine igi di huli huli' ani'. 20 Ho' ike'ni sonohi' nene labana' elamivo hepe' naba elo leli' nene do voziu' vomiu' o-lidivo ne'mine ogo minune' nene gamene ngomosikisi nomive. Nemu' nene akala nevo ma vo lamine' volosune lo gilune' nene alamosa moda goloso olosune lovo' gilune' ve.

Paulo' Do Hongu Lo-ngidine' Gamazi

21 Ne'mine igi mini noso' nite' ni guni nami nizavo gamene ha'na ogo vavo Paulo' nene oto vo vovo'ningu' mino ti' lo lo-ngimine': Vekizo, na'mo Keleta ailani hulamo minelone luvoni' nene gili dalizanako gili damani' ma ve. Gili dadini lezela mulumo nite' mene soto' amidine. Ido' heneni nganenite nene ma vo gopo amidine. 22 Ido' gamazi ma lo-lengemekuvo gililo. Idi'nise lengehelele izamivo lamini minilo. Evene' hamokisi goloso amolosune. Sipivo' goloso oloseive. 23 Neni' nene O'moso'mi gelekele' gipele mino naza opo'ni laa' uvoni' O'moso'ne ne'mo angelo've ma aize' holuka' nenita imiselavo 24 ogo ti' lo lo-nimive: Paulo' gaza guvo nosomu' nene golise gelamozo. Gaza Loma veti guvetinesi ve naba Kaesale' velelo' nene ha vo otelesane lo O'moso'mo noline' nenako akakalo' inite' hamoli'mosi ma do goloso o-gedamivo mo lamine' vo hetelelesane. Ido' gelezo. O'moso'mo geikumu' ve lo gezesi maka' sipiu' nizave muki' inginesi guvo noso ngebelamivo haza vi hetelilisave lo nolive. 25 Ne'mine lo line' nemu' vekizo muludingu' lamine' gililo. O'moso'mo lo-nimine' gamazi nene gihile izeleseive lo gele nouve. 26 Ne neiha sipi ne'mo vo ailani malo' hizo gili' loloseive.

Sipi Nene Nosoli'mo Izo Itine'

27 Ne'mine lo lavo Adilia guvo nosou' hepeli'mo ha lele'mizivo gopo aka novunivo salele seta' ogo vavo holuka' ongo velepeto' sipilo' gono dave ingine misubo ma do avito' ogo noso gahevela noube li gilani'. 28 Ne'mine li nala' hulikevo noso hemuvolo' lemavo a'mine nalali'mi ha'na've nene ve mali'mo gatine' nene vo foti (40) mita ine'. Ne'mine igi ngomo ma nivi nala' gohi hulo gatine' nene vo teoti (30) mita ine'. 29 Ne'mine gatavo sipi nene geheni veleto' do vo izo gili' lo etalive li gili ngehelele izavo sipi isevelati' sipi di gili' li-daa' ani' inite' nene seta've seta've hulikevo lemavo go' la la li O'mosola li nizavo 30 sipilo' gono dave sipi huli golise volone li gili kanu ngomo apasi nalatunu' guvo nosou' hulikevo nolimivo soza li ti' li lani': Laza sipi velela sipi di gili' li-daa' ani' inite' ma hulo minelesa noune. 31 Ne'mine li nilavo Paulo' aza amiliti gizebo ve'inesi ido' eze ami've zuhosi ti' lo lo-ngimine': A'mine ve ingine sipiu' minamilizani' nene lingine ngeli lukuvo ma namilisave. 32 Ti' lo lavo ami ingine sipi nabati' kanu ngomo nene huki hulikevo gopo aka vine'.

33 Ne'mine ogavo Paulo' aza go' lolosa neivo evene' muki' noso' nite' ma nalizave lo ti' lo lo-ngimine': Lingine noso' nite' nami gizebo igi nizavo salele seta' ogo vavo okodine hulikeze. 34 Noso' nite' ni gili' likevo do amuzo molo-lengede minivo aka volone' nene okodine ngomosi ma do goloso amivo lisihe' ogo vo hetelelesune. 35 Ne'mine lavo mukilite ningi nizavo noso' nite' ma do O'moso opo'ni lo do gito api' ogo nani'. 36 Navo ningi mulu'ningu' lamine' gili a'mine'mine igi inginesi noso' nite' nani'. 37 Ido' a'mine sipiu' minune' evene' nene tu hadeti sevedi sikisi ne'mine minune' ve. 38 Noso' nite' no gatude ogavo sipi geni amilive li viti gihile nene sipiuti' ehelu' mili huli nosou' nosou' ani'.

39 Ne'mine ikevo go' lo labana' noilivo misubo ma ningani'za zaa' ebe' nehe li ningi lamine' amani'. Guvo noso gahevela nene zovo' izo kebili galala' ikevo ngipu line' ne'mino minida nene gepe lamine' vai' neivo ningani'. Ningi do volonido' o neivo ma laza sipi nene do vo a'mine gepelo' do dizo hulolone li gilani'. 40 Ne'mine li gili sipi di gili' laa' ani' initeli'mi nalava nene huki huli a'mine sipi do gili' laa' ani' inite' nene guvo noso hemuvolo' nizada ha minilizave li hulani' ido' sipi'mi sitia've setato' nala' di gili' lani' nene apasi huli seli've nene ngomo ma di patelikevo hepeli'mo gepela hilulu' ogo do novivo 41 vo seveto' hize gili' logavo sipi golo've nene misubou' hize gili' lavo guvo noso ne'mo velo ogo sipi isevela izo itine'. 42 Izo etavo ami ingine nene nalato' ve gulo anese izi misubola vi golise vikelizave li ngebele gese' olone li lovo gizani'. 43 Lovo gizikevo gizebo ve'ine aza Paulo'ni bilikelizave lo gelo ne'mine amilizave lo o've lo-ngedo evene' gulo anese izaa' monovo ningikave ingine guvo nosou' oluto' moze' moze' igi gomu' mili gulo anese izi vi kelala vilizave lo 44 evene' lingela alinge' mili linge ma palani malo' dizi mini linge ma sipi izo itido' dizi mini kelala vilizave line'. Lavo ne'mine ogo laza mukito' do goloso amo lamine' vo kelala hetelune.